İctimai-Siyasi Sənədlər Arxivində Xocalı soyqırımının 33-cü ildönümünə həsr olunmuş anım tədbiri keçirilib

Fevralın 26-da Azərbaycan Respublikası Prezidentinin İşlər İdarəsinin İctimai-Siyasi Sənədlər Arxivində Xocalı soyqırımının 33-cü ildönümünə həsr olunmuş anım tədbiri keçirilib.

Tədbirdə Azərbaycan tarixində ən dəhşətli və faciəli səhifələrdən biri olan Xocalı soyqırımının qurbanlarının xatirəsi bir dəqiqəlik sükutla yad edilib.

Sonra Arxivin direktoru Elmira Ələkbərova Azərbaycanın əzəli və əbədi torpaqları olan Dağlıq Qarabağı işğal etmək üçün Ermənistanın apardığı məkrli siyasətdən bəhs edərək bildirib ki, Xocalı faciəsi iki yüz ilə yaxın bir müddətdə erməni şovinist-millətçiləri tərəfindən azərbaycanlılara qarşı müntəzəm olaraq həyata keçirilən etnik təmizləmə və soyqırımı siyasətinin davamı və ən qanlı səhifəsidir. E.Ələkbərova qeyd edib ki, Ulu Öndər Heydər Əliyevin təşəbbüsü ilə Xocalı soyqırımına siyasi-hüquqi qiymət verilmiş, 1994-cü il fevralın 24-də Milli Məclis “Xocalı Soyqırımı Günü haqqında” qərar qəbul etmiş, ölkə Prezidenti, Ali Baş Komandan İlham Əliyevin, Birinci vitse-prezident Mehriban xanım Əliyevanın və Heydər Əliyev Fondunun vitse-prezidenti Leyla Əliyevanın gərgin fəaliyyəti nəticəsində hazırda dünyanın əksər dövlətləri Xocalı qətliamını əsl soyqırım kimi tanımışdır. 44 günlük Vətən müharibəsində Azərbaycan xalqının Ali Baş Komandan cənab İlham Əliyevin ətrafında dəmir yumruq kimi birləşdiyini vurğulayan E.Ələkbərova Müzəffər Ordumuzun düşmənə sarsıdıcı zərbələr endirərək tarixi Qələbə qazandığını və şəhidlərimizin qisasının alındığını bildirib.

Şəhidlərimizin ruhu qarşısında baş əyir, onlara Allahdan rəhmət diləyirik!